ហ្ស៊ីមបាវ៉េ៖ ក្រុមហ៊៊ុន China Energy Engineering Corp. ឬហៅកាត់ថា China Energy បានស្នើនូវគម្រាងសាងសង់រោងចក្រថាមពលពន្លឺព្រះអាទិត្យបណ្តែតទឹកដែលមានទំហំ ១,០០០មេហ្គាវ៉ាត់ នៅលើទំនប់ Kariba របស់ប្រទេសហ្ស៊ីមបាវ៉េ ដោយគ្រោងចំណាយថវិកាជិត ១ពាន់លានដុល្លារ។ នេះបើតាមឯកសារមួយដែលបានចេញផ្សាយនូវថ្ងៃចន្ទនេះ។ 

ប្រទេសស្ថិតនៅភាគខាងត្បូងទ្វីបអាហ្វ្រិកមួយនេះ ក្នុងពេលបច្ចុប្បន្នបង្កើតបានថាមពលតិចជាងពាក់កណ្តាលនៃតម្រូវការថាមពលជាប្រចាំចំនួន ១,៧០០ មេហ្គាវ៉ាត់ ដោយសារការមិនដំណើរការនៃរោងចក្រដើរដោយថាមពលធ្យូងថ្មដែលមានអាយុកាលច្រើនរបស់ខ្លួន រួមជាមួយនឹងកម្រិតទឹកទាបខ្លាំងដែលបានជះឥទ្ធិពលដល់ការផលិតពីរោងចក្រវារីអគ្គីសនីទំហំ ១,០៥០មេហ្គាវ៉ាត់របស់ខ្លួននៅតំបន់ការីបា។ ស្ថានីយ៍ថាមពលពន្លឺព្រះអាទិត្យអណ្តែតទឹកកំពុងក្លាយជាជម្រើសដ៏គួរឱ្យទាក់ទាញកាន់តែខ្លាំងឡើង នៅពេលដែលក្រុមហ៊ុនអភិវឌ្ឍន៍ព្យាយាមជៀសវាងការប្រើប្រាស់ទីកន្លែងធំទូលាយ និងនៅតែផ្តល់ផលប្រយោជន៍លើការប្រើប្រាស់ដីនៅក្នុងតំបន់ដែលមានតម្រូវការខ្ពស់។

បើតាមប្រភពពីឯកសារដដែលបានបង្ហាញថា សំណើរបស់ក្រុមហ៊ុន China Energy ដែលបានដាក់ទៅកាន់់ក្រុមហ៊ុន Zimbabwe Power Company ដែលគ្រប់គ្រងដោយរដ្ឋ និងសម្ព័ន្ធឯកជននៃអ្នកប្រើប្រាស់ថាមពលឧស្សាហកម្មរបស់ប្រទេសហ្ស៊ីមបាវ៉េទាំងមូល ត្រូវបានគេសម្លឹងឃើញថានឹងអាចមានការតម្លើងបន្ទះស្រូបពន្លឺព្រះអាទិត្យប្រហែល ១,៨លានបន្ទះ ដែលមានតម្លៃប្រហែល ៩៨៧លានដុល្លារអាមេរិក ប្រសិនបើគម្រោងនេះទទួលបានការអនុម័ត។ ប្រភពដដែលក៏បានបញ្ជាក់ថា ចំពោះទីតាំងផលិតថាមពលអគ្គិសនីនេះធ្លាប់ធ្វើបានជោគជ័យនៅពីរទីតាំងធំៗរួចមកហើយដែលរួមមាន ទីតាំងរោងចក្រថាមពលពន្លឺព្រះអាទិត្យបណ្តែតទឹកនៅខេត្ត សានទុង (Shandong) និងមួយកន្លែងទៀតនៅក្នុងប្រទេសថៃ។ 

គួរបញ្ជាក់ថា ប្រទេសហ្ស៊ីមបាវ៉េកាលពីសប្តាហ៍មុនបានចាប់ផ្តើមផលិតថាមពលដែលបានមកពីរោងចក្រថាមពលធ្យូងថ្ម ទំហំ ៣០០ មេហ្គាវ៉ាត់ដែលផ្តល់មូលនិធិដោយប្រទេសចិនថ្មីចំនួនពីររបស់ខ្លួននៅតំបន់ Hwange ប៉ុន្តែគ្រោងនឹងផ្លាស់ប្តូរទៅប្រើប្រាស់ប្រភពថាមពលកកើតឡើងវិញសម្រាប់ការផ្គត់ផ្គង់អគ្គិសនីរយៈពេលវែងរបស់ខ្លួន៕